Malapit 300 ka Pantawid Pasada ukon fuel subsidy card ang ipanagtag sang Land Bank of the Philippines kag Land Transportation Franchising and Regulatory Board kadungan sang caravan sang nagkalain-lain nga ahensya sang gobyerno sa Silay City, Negros Occidental bwas, Abril 8.
Sa interview sang Bombo Radyo kay LTFRB Region 6 spokesperson Atty. Salvador Altura, aminado ini nga wala sila sang data kun pila ang nakabaton na sang fuel subsidy card sa Negros Occidental bangud wala nagalabay sa ila ang listahan sang mga benepisyaryo.
Santo sa proseso, application lang ang ginapasa sang operator sa regional office nga ginasumiter naman sa central office agud nga maaprubahan.
Sa tion nga maaprubahan, direkta nga ginapasa sang LTFRB central office ang listahan sa participating branch sang Land Bank of the Philippines sa Bacolod.
Apang as of March 31, may 269 ka card ang wala naclaim sa Land Bank Bacolod apang indi matumod ni Altura kun ano na ini kadugay nga yara sa bangko.
Kadungan sang caravan para sa Integrated Sustainable Assistance for Recovery and Advancement Program (I-SARAP) sa Silay City bwas, magapadulong sa gym sang ciudad ang representative sang Land Bank sa Bacolod agud didto na maclaim sang operator ukon driver ang Pantawid Pasada card.
Suno kay Altura, nakapadala sang communication ang LTFRB Region 6 sa mga asosasyon ukon kooperatiba sang mga operator kag driver nga may inugclaim nga Pantawid Pasada card gani ginalauman nga makuha nila ini bwas.
Subong nga ginhatagan sang Comelec en banc sang exemption ang fuel subsidy program sang ahensya, ginahulat pa sang LTFRB ang official copy sang desisyon sang Comelec agud nga makapadayon na ang regional offices sang pagproseso sang application sang mga operator kag driver.
