Nagapanguna ang mga katapo sang Negros Occidental Police Provincial Office sa may pinakadako nga volume sang illegal nga druga nga nakumpiskar sang mga otoridad halin sang bulan sang Enero tubtub Marso subong nga tuig.
Sa interview sang Bombo Radyo kay Police Lt. Col. Arnel Solis, spokesperson sang Police Regional Office 6, P29 million ang kabug-usan nga balor sang suspected illegal drugs nga nakumpiskar sa bilog nga Western Visayas sa sulod sang tatlo ka bulan.
P18 million ang nakumpiskar sang mga personnel sang Negros Occidental Police Provincial Office kun sa diin 191 ka drug personalities ang naaresto.
Nagapangaduha ang Bacolod City Police Office nga may 170 ka persona nga nadakpan sa Bacolod kag P12 million ang balor sang illegal drugs nga nakumpiskar.
Nagapangatlo ang Iloilo City Police Office nga may 48 nga naaresto kag P3.5 million ang balor sang shabu nga nakumpiskar; nagapang-apat ang Capiz PPO nga may 24 nga nadakpan kag nakakumpiskar sang P4 million drugs; 14 ang nadakpan sang Iloilo Police Provincial Office kag walo sa Aklan Police Provincial Office; samtang tag-duha naman ang nadakpan sa Antique PPO kag Guimaras PPO.
Suno kay Solis, ginapanginbulahan sang PRO 6 ang mga police officers sa Negros Occidental bangud sa efforts nga madakpan ang madamo nga drug personalities.
Nagpanugyan man ini sa mga nagaduso sang illegal nga druga nga mag-untat na sa illegal nga buluhaton bangud wala sang forever sa ginadumilian nga druga.
