Duha ka miyembro sang New People’s Army ang nadakpan sang 94th Infantry Battallion sang Philippine Army kag Himamaylan City Police Station sa magkatuhay nga lugar sa bahin sang Himamaylan City, Negros Occidental sang Abril 7.
Sa interview sang Bombo Radyo Bacolod kay Brigadier General Inocencio Pasaporte, commander sang 303rd Infantry Brigade, ang duha ka arestado ang ginkilala kanday Jason John Gazon, 30 anyos, courier kag miyembro sang SDG Platoon sang Central Negros 2, residente sang Purok 2, San Antonio syudang sang Himamaylan kag Kenneth Nabong, 31 anyos, courier/ member sang SDG Platoon sang Central Negros 2, kag residente sang Sitio Uwakan, Barangay Buenavista, Himamaylan City, Negros Occidental.
Sila ang nadakpan paagi sa pagserbe sang warrant of arrests sa kaso nga murder kag frustrated murder sa ginpatigayon nga Joint Enhanced Military Police Operations (JEMPO) sang 94th IB sang Philippine Army kag Himamaylan City Police Station.
Suno kay Pasaporte, ang duha ang natumod nga kabahin sang grupo nga naengkwentro sang tropa sang gobyerno sang mga tinalikdan nga tinuig kag sa engkwentro sang tinalikdan lang.
Suno sa report ang duha ang nagadeliver sang mga armas sa rebelde nga grupo.
Ginpahayag man ni Pasaporte nga mahimo nga may iban pa nga miyembro sang CTG nga nagapanago sa syudad sang Himamaylan.
Ang duha ang yara sa karun sa kustodiya sang Himamaylan City Police Station.
