Isa ka programa ang ginpatigayon sa Tomb of the Unknown Soldiers sa Bacolod City public plaza kaina sang aga kadungan sang pagdumdom sang ika-80 nga anibersaryo sang The Fall of Bataan ukon Araw ng Kagitingan subong nga Abril 9.
Ang programa ang gintambungan sang lokal nga mga opisyales sang Bacolod, mga opisyal sang Bacolod City Police Office, Negros Occidental Police Provincial Office kag 303rd Infantry Brigade sang Philippine Army kag retirees sang Armed Forces of the Philippines sa probinsya.
Pagkatapos sang flag raising ceremony, naghalad ang mga opisyales sang bulak sa Tomb of the Unknown Soldiers.
Bilang tiglawas sang militar, ginpahayag ni Lt. Col. Arnel Calaoagan, executive officer sang 303rd IB, nga kinahanglan mag-isa ang mga Pilipino agud nga malampuwasan ang anuman nga pagpanghangkat.
Aminado naman ini nga modelo kag inspirasyon ang mga beterano sa ulihi nga henerasyon nga palangganon ang pungsod.
Bilang tiglawas sang Bacolod City government sa programa, aminado si Bacolod City Councilor Renecito Novero nga ang Araw ng Kagitingan ang isa ka masadya kag masubo nga adlaw – masadya bangud nagaenjoy kita sa karon sang demokrasya apang masubo bangud nagresulta ini sa kamatayon sang mga baganihan.
Suno kay Novero, isa ini ka pagpanghangkat para sa mga Pilipino nga sundon ang ila nga selfless devotion para sa Pilipinas kag indi man magdinalok sa pareho nga Pilipino.
Suno sa konsehal, wala kita nagapakig-away batok sa mga dumuluong nga kontra apang may pagpakig-away gihapon subong ilabi na nga nagahilapit na ang eleksyon sa Mayo 9.
Kun balikdon ang pagpakig-away sang mga suldado, handom sang mga ini nga mahatagan ang Pilipinas sang husto nga pangginahom.
Subong naman nga nagahilapit ang eleksyon suno kay Novero, ang pagpakig-away sa karon ang para sa pagpili sang maalam, maayo kag responsable nga mga opisyales.
