Gin-aresto ang anom ka mga suspetsado nga nagpakilala bilang katapo sang isa ka religious group matapos nga gintuyo nga mangilkil sang P50 million gikan sa isa ka kandidato sa pagka-kongresista sa Negros Oriental.
Gindakop sang mga otoridad ang mga suspetsado kag nakilala ang ila nga lider nga si Amelito Dela Cruz, nga nagpakilala nga ministro sang Iglesia Ni Cristo (INC).
Suno kay Negros Oriental Representative Arnulfo Teves, nagcontact sa iya ang mga suspetsado sang nakaligad nga Nobyembre 2021 kag nagpakilala nga opisyal sang religious group.
Nagpromisa ang mga ini nga siya ang iga-endorso sa eleksyon sa baylo sang ila ginapangayo nga balor.
Apang suno sa Congressional Candidate nga sang damlag lang, ginsakaan sang mga suspetsado ang balor sang kwarta nga ila ginapangayo.
Suno kay Teves, nagpangamusta ang mga ini sang iya natuhoy sa balita maykaangtanan sa iya nga bata kag nagtugyan sang negosasyon bangod nagahilapit na ang eleksyon.
Pahayag sini nga nangin P50 million na ang ginpangayo sa iya kag down payment nga P25 million.
Gilayon naman nga nagpangayo sang bulig si Teves sa National Bureau of Investigation (NBI).
Pahayag ni NBI Assitant Regional Director Neol Bocaling, nga nagpakilala nga ministro kag apo sang executive minister sang INC ang mga suspetsado gani ila nga ginverify ang impormasyon.
Nahibaluan sang mga ini nga wala sang kamatuoran ang pahayag sang mga suspetsado bangod wala sang ministro nga kaangay sang ila nga mga pangalan.
Dugang pa sini nga bisan ang katapo sang Iglesia ni Cristo nga ila ginpamangkot ang nakibot bangod ang favorable endorsement sang Iglesia ni Cristo ang paagi sa espiritu kag wala ini ginabaligya.// Wala naman nagpagwa sang pahayag ang mga gindakop nga suspetsado.
Suno kay NBI Director Eric Distor, ginahibalo na sang mga ini kun sin-o pa ang iban nga kasabwat sang grupo sa ila nga religious endorsement scam para sa palaabuton nga eleksyon.
Nagpasalig man ini nga bukas ang opisina sang NBI sa pagbaton sang mga complaints batok sa mga grupo kaangay sang ila nga gin-aresto.
