MELBOURNE – Ginban sang Ukraine ang tanan nga imports gikan sa Russia, nga isa sa ila nga nagapanguna nga trading partners antes ang gyera kun sa diin may tuigan nga importasyon nga nagadangat sa 6 billion dollars.
Ang Ukraine ang kasunod naman nga nagpanawagan sa iban nga mga pungsod nga magsunod sa ila kag pagpatuman sang mas mabug-at nga sanctions sa Moscow.
Sa sulat ni Economy Minister Yulia Svyrydenko, gin-anunsyar sini ang complete termination sang trade sa goods gikan sa bayolente nga pungsod.
Suno diri, wala na sang produkto nga gikan sa Rusian Federation ang makasulod sa ila nga teritoryo.
Humalin sang mag-umpisa ang Russian invasion sa Ukraine sang Pebrero 24, ang pagbayluhanay sang produkto kag serbisyo sa tunga sang duha ka pungsod ang wala na nagakatabo, apang sa anunsyo sang Sabado, ang termination sang imports ang opisyal na nga nangin layi.
Suno kay Svyrydenko, ang budget department sang kontra ang indi magabatun sang pondo nga makapanubo man sang ila nga pamaagi agud nga mapondohan ang gyera.
Pahayag sini nga ang tikang sang Ukraine ang magaserbe nga ihimplo para sa ila nga mga Western partners kag maga-engganyo sa mga ini nga pabug-aton pa ang sanctions batok sa Russia kalakip na ang implementasyon sang energy embargo kag pag-untat sang transaksyon sa Russian banks.
Makapila naman ka beses nga ginapanawagan ni Ukrainian President Volodymyr Zelensky sa West nga i-boycott ang Russian oil kag iban pa nga mga exports kasubong man untaton na ang pag-export sa Russia bangod sa pagpang-atake sang ila militar.
