Pila ka bahin sa probinsya sang Negros Occidental ang nakaeksperyensya sang pagbaha tuga sang wala untat nga pag-ulan.
Sa syudad sang San Carlos nagpagwa sang executive order si San Carlos City Mayor Renato Gustilo sa pagsuspend sang mga klase primary school kag elementary school sa syudad tubtob buas nga adlaw; sa syudad sang Sagay suspended man ang trabaho kag klase.
Ang banwa sang Murcia, EB Magalona, syudad sang Victorias, Silay, Talisay ang kasubong man nga wala sang klase kag trabaho magluwas na lamang sa mga nadestino sa emergency services.
Ang probinsya sang Negros Occidental ang ginpaidalom na sa red alert bangud sa Bagyong Agaton antes paman ini nakasulod sa Philippine Area of Responsibility (PAR).
Nagalaom man si Negros Occidental Governor Eugenio Jose “Bong” Lacson nga bisan magpadayon ang pag-ulan indi na makaeksperyensya sang pagbaha ang probinsya kaangay lamang sa naeksperyensyahan sang tinalikdan nga tuig sang nagwaswas si Bagyong Odette.
Ginpahayag man ni Lacson nga ang pagsige sang ulan ang maayo para sa mga mangunguma apang ang sobra nga pag-ulan ang makahalalit na.
Nagpanugyan man ang gobernador nga kun ang tubig sa suba ang magsakam, ang mga pumuluyo ang dapat nga gilayon man nga mag-evacuate.
Nagpanawagan man si Lacson sa mga pumuluyo nga dapat mangin alerto sa tanan nga tion bangod wala mapaktan ang dalagan sang panahon.
