Maayo nga tawo ang pagkakilala sang alkalde sang banwa sang Hinobaan sa principal nga nagtiro-patay sa manunudlo kag bana sini sa Bilbao-Uybico National High School kaina sang aga.
Suno kay Hinobaan Municipal Mayor Ernesto Estrao, mabuot kag malipayon nga sahi sang tawo si Warren Escosar.
Ginakasubo man ni Estrao ang natabo kag indi man siya makapati nga nahimo ini sang principal apang wala man sini ginadula nga kun yawa na ang magsulsol, nagakatabo ang wala ginalauman nga matabo.
Suno sa alkalde ginaaligar nga ang pagreklamo sang biktima sa 8888 ang ginhalinan kun ngaa gintiro sang principal ang manunudlo bangud sang nahibaluan ni Escosar nga may nagcomplain sa iya, gintipon niya ang mga manunudlo apang wala sang nag-ako.
Naghimo man si Escosar sang pamaagi agud matukiban kun sin-o ang nagcomplain sa iya kag santo sa aligasyon, ang biktima nga manunudlo amo ang nagreklamo sa iya.
Suno kay Estrao sa karun hulaton nalang ang resulta sang imbestigasyon sang Scene of the Crime Operation (SOCO) kag mga kapulisan sa krimen agud mahibaluan ang tul-id nga rason kasunod sang shooting incident.
Nagapanawagan man ang alkalde sa mga pumuluyo nga indi magkomentar kag magpagwa sang indi kompirmado nga mga impormasyon angot sa natabo nga insidente kag hulaton nalang ang opisyal nga pahayag nagikan sa mga otoridad.
