Ginkompirmar sang pinuno sang Provincial Disaster Management Program Division (PDMPD) sa Negros Occidental nga ang ginabantayan nga Bagyo Basyang ang nakasulod na sa Philippine Area of Responsibility (PAR) kaina sang aga santo man sa bulletin nga ginpagwa sang PAG-ASA.
Suno kay Dr. Zeaphard Gerhart Caelian, ang Bagyo Agaton ang nangin Low Pressure Area na lamang kasunod sa pagsulod sang Bagyo Basyang sa PAR.
Suno kay Caelian nakita sa weather forecast sang PAG-ASA nga higupon sang Bagyo Basyang si Agaton nga LPA na sa karun pababaw.
May pila na ka LGU sa probinsya sang Negros Occidental nga nagpatigayon sang evacuation kasunod sang wala untat nga pagbubo sang ulan.
Sa banwa sang EB Magalona, nag-evacuate ang lima ka barangays ukon 261 ka pamilya; sa syudad sang Talisay may nagevacuate sa siyam ka barangays, 218 ka pamilya ukon 1,117 ka mga indibidwal; sa syudad sang Victorias, 17 ka barangays ukon 233 ka mga pamilya samtang ang syudad sang Silay ang padayon pa nga ginamonitor bangud sa pagsaka sang tubig-baha.
Sa syudad sang Cadiz walo ka barangay ukon 258 ka pamilya ang gin-evacuate samtang nagapadayon pa ang ila nga pagmonitor kag nagahulat pa sang report nagikan sa mga LGUs.
Nagpanugyan man si Caelian nga mag-aligmat, mangin preparado kag magpangamuyo sa tanan nga tion kadungan sang indi maayo nga panahon.
