Ginalauman nga subong nga adlaw, makabalik na sa ila mga puluy-an ang 358 ka mga pamilya kag 1,216 ka mga pumuluyo nga nag-evacuate sa siyam ka mga barangay sa Cadiz City bangud sa Tropical Depression Agaton.
Sa interview sang Bombo Radyo kay Cadiz City Mayor Bading Escalante, kahapon sang aga, 358 ka mga pamilya kag 1,216 ka mga pumuluyo ang ginpang-evacuate kag ginpangrescue sa ila tagsa-tagsa ka mga puluy-an kag yara sa karun sa mga evacuation centers sang Barangay Daga, Barangay Luna kag Barangay Caduhaan.
Suno kay Escalante, kahapon sang hapon amat-amat na nga nagtahaw ang ulan kag wala man sang untoward incidents nga nagluntad.
Wala man sang problema sa assistance ilabi na sa pagkaon suno sa iya bangud madamo man ang ginpanagtag para sa mga evacuees.
Kun magmayo na ang tiyempo subong nga adlaw, ginalauman nga makabalik na sa ila mga puluy-an ang mga evacuees.
