Temporaryo nga suspendido ang pagpatigayon sang kampanya sang mga kandidato sa 2022 Election sa Huwebes kag Biyernes Santo, Abril 14 kag 15.
Paathag ni Negros Occidental Election Supervisor Atty Roberto Salazar, nakabutang sa Commission on Election (Comelec) Resolution 10730 nga ginadumilian ang pagpangampanya bilang pagtahod sa pagtuluohan kag tradisyon sang Simabahang Katoliko.
Suno kay Salazar ang ginakabig nga unlawful kag illegal campaigning santo sa resulusyon amo ang pagkampanya sa tion sang Maundy Thursday kag Good Friday kasubong man sa Mayo 8, antes ang adlaw sang piniliay.
Sa pihak nga bahin ginapahanumdom man sang Election Supervisor nga ginadumilian ang mga nagakandidato sa eleksyon nga magpadulong sa mga evacuation center agud personal nga maghatag sang relief assistance sa tion sang mga kalamidad.
Kaangay nalang sa ginpatigayon nga mga evacuation efforts sa nagkalain-lain nga lokalidad sa probinsya bangod sa mga pagbaha dala sang bagyo Agaton.
Suno kay Atty Roberto Salazar, ini ang nakapagkit sa section 104 sang Omnibus Election Code.
Paathag sini nga kun luyag gid nga magdonar sang kandidato ukon sang ila nga partido, mahimo ini paagi sa pagtanyag sang mga donasyon sa Philippine Red Cross ukon ano paman nga ahensya nga ginapahanugutan sang gobyerno sa pagpagwa sang pondo kag wala nakalakip sa banning.
Ini agud indi magamit sang mga nagakandidato ang sitwasyon agud nga makapamintaha.
Paathag sang abogado nga may kalamidad man ukon wala, hugot nga ginadumilian sang Comelec ang mga paghatag sang donasyon sang mga nagapapili sa pwesto sa gobyerno.
Ang mga kandidato nga magabayolar sa nasambit nga mga election offenses ang mahimo mangatubang sang isa tubtob anom ka tuig nga pagkapriso, monetary penalties kasubong man ang perpetual disqualification sa pagpapili sa eleksyon.
