Isa ka miyembro sang New People’s Army ang patay kadungan sang engkwentro batok sa mga suldado sa Sitio San Juan, Barangay Caradio-an, Himamaylan City, Negros Occidental, alas-5:00 kaina sang kaagahon.
Suno kay 3rd Infantry Division spokesperson Capt. Kim Apitong, naghatag sang impormasyon ang mga pumuluyo nga may presensya sang armado nga mga lalaki sa lugar.
Sa pagresponde sang mga miyembro sang 94th Infantry Battalion, ila nga naengkwentro ang indi pa matumod nga numero sang mga rebelde.
Suno kay Apitong, naglawig sang 10 minutos ang pagbayluhanay sang lupok sang mga suldado kag mga rebelde tubtub nga nagretreat ang NPA fighters sa northeast direction.
Isa ka miyembro sang NPA ang napatay sa nasambit nga engkwentro apang wala pa sang identity tubtub subong, samtang hilway naman ang tanan nga mga suldado.
Suno kay Apitong, ginbilin sang iya mga kaupod ang napatay kag nakit-an man sa withdrawal route ang tinulo sang dugo nga patimaan nga may napilasan pa gid sa mga rebelde.
Narekober man sa encounter site ang mga bala ang high-powered firearms, tablet, backpack kag medical kit.
May yara man sang nakaengkwentro ang 11th Infantry Battalion sa Negros Oriental subong nga Biyernes Santo apang indi pa makahatag sang dugang nga detalye si Capt. Apitong angot diri.
