Kadungan sa pagselebrar sang balaan nga panahon sang Semana Santa, Easter Sunday, nagatamyaw ang Parish Priest sa Our Lady of Candles Parish sang Happy Easter sa tanan nga mga kauturan kay Kristo.
Sa mensahe ni Msgr Felix Pasquin, nga subong nga Semana Santa, dapat nga pamalandungan kag panumdumon nga may pagpasalamat sa tagipusuon ang kasakit, pagkamatay kag pagkabanhaw sang Ginoo nga si Kristo.
Bangod sini, atun naangkon ang kaluwasan.
Suno kay Msgr Pasquin, ang kasakit sang Ginoo humalin sa pagdakop kag kamatayun ni Hesus sa Krus ang isa sa mga masubo nga hitabo, ilabi na sang Siya ang wala gin-unongan kag gintalikdan sang iya nga mga Gintutun-an.
Ang nagpabilin nalang sa pag-unong sa Ginoo tubtob sa krus kag sa kalbaryo amo si berhing Maria, pila ka mga babayi kag ang isa sa Iya nga gintutun-an.
Pahanumdom ni Msgr Pasquin nga sa subong nga Semana Santa, dapat nga pinsarun ang atun nga mga desisyon kun ini bala ang pag-unong kay Kristo Hesus ukon pagtalikod sa Iya.
Dugang pa sini nga isa man sa hangkat karun sa tanan amo ang pagpili sa eleksyon kun sa diin matakos man kun kita ang naga-unong ukon magatalikod kay Kristo.
Pahanumdom man ni Pasquin nga si Hesus mismo ang nagsiling nga ang wala naga-upod ang katumbas na nga nagabatok sa Iya.
Paathag sini nga ang simbahan ang may katungdanan sa paggiya sa iya nasakpan bilang kabahin sang moral vibe ukon konsensya sa sosyodad.
Gani ini ang nagakahulugan kaangay sa ginhambal sang Ginoo nga ang nagapamati sa Simbahan ang kasubong man nga nagapamati sa Diyos.
Panawagan sang simbahan nga dapat manindugan kag magbuhat sang nagakaigo nga pagpili.
Bangod ang pagpili sang husto ang makabig naman nga pagpanindugan para kay Hesus kag pagtabog sa yawa.
Sa kalibutan nga naputos sang kadulom, pagbinutig kag kurapsyon, ang simbahan ang nagapanawagan sa pagsunod kay Kristo kag nagpaandam batok sa pagsulod sa madulom nga banas sang pagbinutig kalakip na ang pagbaklanay sang boto.
Dugang pa ni Msgr Pasquin nga dapat magpangayo man kita sang pag-ubay sang Espiritu Santo, agud nga kita ang makaangkon sang kaisog sa pagpanindugan para kay Kristo.
Dugang pa sini nga wala sang lugar para sa neutrality bangod ini ang mangin paagi lang agud mabuligan ang mga binuhatan sang yawa.
Kadungan sa paskwa sang pagkabanhaw, pangabay ni Msgr Pasquin nga sa pagkatapos sang eleksyon, maagom sang Pilipinas ang masanag nga bwas damlag kag panibag-o nga kabuhi. Samtang, kasunod sa adlaw sang pagkabanhaw ni Kristo, Easter Sunday, nagbilin man sang pila ka mga pahanumdom si Fr Gerardo Alminaza, ang Bishop of San Carlos.
Sa iya nga Easter Message, ginpahayag sini nga sa adlaw sang pagkabanhaw, nadaog na sang Ginoo ang kadulom, kalainan kag sala.
Bangod sini kita ang nakaangkon na sang paglaom.
Pahanumdom ni Fr Alminaza nga indi na kita dapat magpabilin sa kalisod ukon sa kasubo.
Dugang pa sang pari nga bag-o lang natun ginbag-o ang atun nga saad sang kita ang ginbunyagan, nga atun sikwayon ang kalainan kag ang kabutigan ni Satanas.
Kun sa diin ang atun nga pilion nga sundon ang Ginoo, ang iya nga dalan sang paghigugma.
Pangabay ni Fr Alminaza nga puno sang paglaom nga magapadayun kita sa pagpanglakatun bilang isa ka katawhan ilabi na nga naga-atubang sa dako nga pagpanghangkat sa palaabuton nga piniliay para sa masunod nga tagdumala sang pungsod.
Pangabay sini nga kita ang bugayan sang Espiritu Santo agud nga masanagan kag ang maggagwa nga desisyon amo ang kabubut-on sang Diyos.
Ginalauman naman sini nga ang desisyon ang magadala sa kabuhi nga may kasanag, kalipay, paghidaet kag paghili-usa.
Pahanumdom man ni Fr Alminaza nga magpadayun kita sa pagpangamuyo nga mauntat na ang nagakatabo nga gyera sa nagkalainlain nga lugar.
Kadungan sa pagtamyaw sang Happy Easter, si Fr Alminaza ang nagpangabay man nga maagum natun ang handom nga bag-ong kabuhi para sa pungsod.
