Ginalantaw ni Atty. Jomax Ortiz nga ang nagakatabo sa karun sa tunga sang mga presidentiables sang opposition ang pabor para sa kandidatura ni former Senator Ferdinand “Bongbong” Marcos.
Suno kay Atty. Jomax Ortiz, ang pag-apelar ni Manila Mayor Isko Moreno sa mga pumuluyo kag kay Vice President Leni Robredo nga magwithdraw sang iya kandidatura ang nagapakita lamang nga ila ginakumpirmar ang resulta sang mga survey kun sa diin nagapanguna si Marcos.
Suno kay Ortiz, posible nga magboomerang batok kay Moreno ang iya apelasyon kag imbes nga magkadto sa iya ang boto sang mga tawo para kay Robredo, may posibilidad nga magkadto pa ini kay Marcos bangud nature sang tawo nga mas pilion ang opposite sang luyag sang isa ka persona nga ila nainitan.
Suno diri, daw kaangay nga ginpatay ni Moreno kag sang iya grupo ang posible nga momentom sa karun ni Robredo bangud nagasaka man ang iya ratings sa survey.
Suno sa iya, imbes nga updan si Robredo bangud nagaagum ini sang momentum, ila pa ini ginabutong padalum gani dako ang posibilidad nga mainit ang mga supporters sang bise-presidente kay Moreno.
Nagapati man ang political analyst nga may political hallucination ang alkalde kag nagadamgo bangud wala ini gani nakasulod sa pagka-Senador sang 2016, apang ginaduso niya pa nga magpaubos si Robreda, nga amo mismo nakalutos kay Marcos sa pagkabise-presidente sang tinalikdan nga eleksyon.
Nagapati ini nga indi kinahanglanon ang iya ginahimo kag nagapakita lamang sang crab mentality.
Gindugang man sini nga pati ang numero sang mga nagtalambong sa rallies ni Robredo ang ginakwestiyon man ni Moreno.
Bangud diri, nagakaguba ang unity kag imbes nga mag-isa ang opposition, sila ang nagakabuwag pa gani pabor ini para kay BBM.
Suno kay Ortiz, sa masunod nga mga inadlaw mahibaluan kun ano ang mangin epekto sang sini nga tikang sang mga kandidato.
