Nagapati ang isa ka political analyst nga naigo ang ego sanday Senator Panfilo “Ping” Lacson, Senator Manny Pacquiao, anay Defense Secretary Norberto Gonzales kag Manila Mayor “Isko” Moreno sang sila ang ginaalegar ginapawithdraw sang kampo ni Vice President Leni Robredo agud mag-isa ang opposition.
Kahapon, nag-isa nga gin-anunsyar sang apat ka mga presidentiables nga indi sila magwithdraw sa ila kandidatura sa pagka-Presidente kadungan sang ginpatigayon nga joint press conference sa Manila Peninsula Hotel sa Makati City kadungan sang Easter Sunday.
Nagpanawagan man si Moreno kay Robredo nga iwithdraw ang iya kandidatura para sa pagka-Presidente bangud nagapadalagan lamang ini agud mapunggan ang pamilya Marcos sa pagbalik sa Malacanang.
Suno kay Atty. Jomax Ortiz, matawag nga conspiracy ang bahin sang apat ka mga presidential candidates bangud posible nga naigo ang ila ego kag pride sang sila ang ginpawithdraw sang kampo ni Robredo.
Suno kay Ortiz, kabahin sang political strategy ni Robredo ang pagpanawagan sang withdrawal sang iban nga presidentiables bangud kun indi magtingob ang opposition, mapierde sila santo sa resulta sang mga survey.
Suno diri, indi pwede nga mabalewala lamang ang survey bangud isa na ini ka mensahe nga dapat islan sang opposition ang ila stratehiya kag ini ang paghimo sang supreme sacrifice sa mga kandidato nga wala tiyansa magdaog.
Suno sa iya, nagagwa nga may crab mentality ang mga presidentiables bangud yara na sa babaw si Robredo, ila ini ginabutong padalum tungod nga sila ang nainsulto.
Ginalantaw man sini ang posibilidad nga stratehiya ini ni former Senator Ferdinand “Bongbong” Marcos nga paglabugay sang opposition bangud si Gonzales, nga amu ang nagpatawag sang press conference, ang tinawo ni Presidente Rodrigo Duterte.
