Ginpasalamatan sang station commander sang Bacolod Police Station 2 ang Ginoo, ang city director sang Bacolod City Police Office (BCPO) kag ang mga personnel sang Police Station 2 kasubong man ang mga pumuluyo nga sakop sang area of responsibility nila matapos nga liwat nga magpanguna sa Unit Performance Rating (UPER) nga ginpatigayon sang Police Regional Office (PRO) 6.
Sa Good Morning Philippines, ginpakigbahin ni Police Captain Paul Vincent Pendon nga indi sini pag-angkunon ang pagkilala bangud dako ang nangin kabahin sang personnel sang station 2 agud nga makuha ini.
Suno kay Pendon bilang station commander sang Police Station 2 ginatugutan sini ang personnel sini nga magplano para sa mga police operations kag siya ang nagadesisyon kun paano kag san-o ini patigayunon.
Ginpahayag man sang station commander nga wala sa iya batasan nga siya nalang ang masunod bangud siya ang leader sabaylo palareho kag alalangay ang pagtratar sang mga ini sa kadaisa ukon kaangay na lamang s sang isa ka pamilya.
Ginpasanyog man sini ang mga police visibility sa ila AOR kun sa diin nakabulig man sa paghagan-hagan sang crime rate.
Dako man ang pagpasalamat sini nga sa pihak sang mga nasapwan nga mga bangkay sa ila AOR gintungahaan kag nagbinuligay sila agud nga masolbar kag malampuwasan ang pagtilaw.
Masami man sini ginahambal sa mga personnel sang Police Station 2 nga himuon sang mga ini ang insakto kag tindugan niya ang mga ini tubtob sa katapusan ingkaso nga may matabo nga indi malikawan nga mga hitabo bilang ila nga station commander.
Suno kay Pendon magluwas sa pulong sang Ginoo nga ginahimo sini nga giya agud nga magmadinalag-on sa iya propesyon, isa man sa mantra sini ang ginhambal sa iya sang iya amay nga anay man nga katapo sang Philippine National Police nga “himua kun ano ang insakto bangud ang insakto never ini mangin sala apang ang sala never man ini mangin insakto.
Wala man ini malipat nga magpasalamat sa katapo sang media kaangay sang Bombo Radyo Bacolod sang madasig nga pag-upod sa ila sa oras nga kinahanglanon nila ang media personnel agud nga magwitness sa ila buybust operation.
