Suspendido ang tanan nga klase sa elementary kag secondary education sa tanan nga pampubliko nga eskwelahan humalin sa Mayo 2 tubtob 13 bangod sa preparasyon para sa May 9, 2022 National and Local Elections.
Suno kay Ian Arnold Arnaez, public information officer sang Department of Education (DepEd) Division of Negros Occidental, tinalikdan palang nga tuig, nalakip na sa School Calendar sa idalum sang DepEd Order No. 9.
Santo sa DepEd Order ang May 2 tubtob 13 nga klase ang suspendido bangod sa mga Election-related activities partikular na nga nagaserbe sa eleksyon ang mga manunudlo kasubong man nga ginagamit nga polling centers ang mga buluthuan.
Halos duha ka semana naman ang wala sang klase bangod sa preparasyon sang mga manunudlo sa buluthuan agud nga mangin nagakaigo sa maabot nga piniliay.
Apang paathag sini nga ang mga manunudlo nga wala sang obligasyon nga magserbe sa eleksyon ang kinahanglan gihapon nga magreport sa eskwelahan.
Apisar nga suspended ang klase, suno kay Arnaez, magamit naman sang mga bakante nga manunudlo ang tion para sa remedial classes sang mga estudyante nga may mga behind subjects.
Mahimo man ang mga ini nga makapatigayon sang home-visitation ukon pabasa kag magpanagtag sang modules sa nasambit nga tion.
Pasalig naman ni Arnaez nga sang tinalikdan pa nakapatigayon sang inspection ang Bureau of Fire Protection (BFP) nga amo ang commissioned sa pagseguro sang mga pasilidad partikular na sa electrical system.
Santo sa DepEd Resolution, ang klase ang magabalik sa Mayo 14 apang bangod sa ini ang nagtupa sa Sabado, ginlantaw sini nga sa Mayo 16, adlaw sang Lunes na ang pagbalik sang klase.
