Ginpahayag sang gobernador sang Negros Occidental nga palpak ang ginpatigayon nga press conference sang tatlo ka presidential candidates nga sanday Manila Mayor Isko Moreno Domagoso, Senator Panfilo Lacson kag anay national defense secretary Norberto Gonzales bangod ang tawo ang naga-ekspektar sang mas dako sangsa ginpahayag sang mga ini.
Gintawag ni Negros Occidental Governor Eugenio Jose “Bong” Lacson nga “dud” ukon defective ang press conference bangod ang ginalauman sang tawo nga may magawithdraw sa kandidatura agud nga magsuporta ukon mag-isa nalang sa isa ka oposisyon nga presidential candidate.
Suno kay Lacson, dismayado ini bangod sang una palang sini nga makita ang mga Presidentiables nga imbulbado, nga kalakip sa mga may manubo nga rankings sa mga survey, naglaom ini nga magadesisyon sila nga magpaubos nalang kag pilion nga irepresentar ni Mayor Isko Moreno bangod siya ang may pinakamataas nga rating gikan sa mga nagtambong.
Apang suli sa ginalauman, ang ginpahayag sang mga ini amo ang butang nga nahibaluan na ngadaan sang katawhan, kaangay sa paathag nga kinahanglan nila mag-isa batok sa kandidatura ni Presidential Candidate Ferdinand “Bongbong” Marcos kag vice presidential candidate Sara Duterte.
Suno kay Lacson, ang kaangay nga announcement nga nahibaluan naman sang tanan ang indi na kinahanglan sang pagpatawag sang press conference.
Deskripsyon sini nga ang natabo ang kaangay sang umido nga bomba kun sa diin nagsirit lang kag wala natabo ang ginalauman sang tawo nga pagsigabong.
Nagagwa pa suno diri nga si Mayor Isko Moreno lang ang may gusto nga magwithdraw si Vice President Leni Robredo sa iya nga presidential bid santo sa announcement sini, bangod gilayon man nga ginpanginwala ni Senator Ping Lacson nga wala siya naga-upod diri kag gwa na ini sa ila nga naistoryahan.
