May kaakig nga nagapanawagan sang pag-ulikid gikan sa Department of Education kag sa otoridad ang utod sang ginpatay nga manunudlo, kag bana sini sang mismo nga prinsipal sa Bilbao Uybico National High School sa Barangay Po-ok, Hinobaan, Negros Occidental.
Madumduman nga sa sulod mismo sang school campus ginluthang sang prinsipal nga si Warren Escosar ang manunudlo nga si Almarisa Aroy kag bana sini nga si Christopher Aroy sang Abril 12, nga ginsundan man sang pagpanginmatay sang prinsipal.
Sa karun, nagapanawagan si Angelyn Aborido Almolanida, magulang ni Mrs Aroy sang pag-unong sang DepEd, bangod kaangay nga wala lang ang mga ini sang pagtamod.
Suno kay Angelyn, napatay ang iya utod samtang yara sa serbisyo gani panawagan sini nga bisan buligan man lang ang mga ini sa pagpalubong sang mga biktima pati na sa pag-ulikid sa nabilin nga duha ka magagmay nga kabataan.
Isa pa sa ginapanawagan sini ang paghatag sang atensyon sang DepEd sa seguridad sa mga buluthuan.
Suno diri, ang dapat nga dala sa eskwelahan ang ballpen kag papel nga gamit sa pagtuon, apang kwestyon sini kun ngaa nakapasulod sang armas ang prinsipal.
Suno sa iya, indi lang pagtudlo ang responsibilidad sang DepEd sa mga estudyante kag manunudlo kasubong man ang ila nga safety samtang yara sa sulod sang school campus.
Bangod sa natabo, nagakabalaka na ini sa kredibilidad sang eskwelahan nga proteksyunan ang mga naga-eskwela kag manunudlo nila.
Natingala man ini kun ngaa wala sang security guard sa campus nga bisan kuntani nagbulig nalang agud indi madayun ang pagpangluthang sang prinsipal.
Suno diri, kaangay nga ginkonsabo ang security kag ginpapalayo agud mahimo ang krimen.
