Gindala na sa isa ka warehouse ang vote counting machines (VCM) nga nag-abot sang Hwebes Santo sa syudad sang Bacolod
Sa interview sang Bombo Radyo Bacolod kay Bacolod City Election Officer Atty. Revo Sorbito, may yara sang 450 ka mga vote counting machines (VCM) nga para sa ciudad sang Bacolod nga gamiton para sa May 9, 2022 election.
Suno kay Sorbito, magluwas sa VCM, nag-abot man ang isa ka laptop nga pagagamiton para sa canvassing sang mga boto.
Suno sa election officer madasig man ang pagwa sang resulta sang election kun wala lamang sang maengkwentro nga problema.
Santo sa personal sini nga eksperyensya sa iban nga syudad kun sa diin siya na-assign sadto, ala 01:00 ukon alas 02:00 sang kaagahon sang kasunod nga adlaw nagakatapos na ang pagcanvass sang mga boto kag nagagwa na ang resulta, nga ginalauman niya man nga matabo sa syudad sang Bacolod.
Ang mahimo lang nga maengkwentro nga problema sa eleksyon amo ang pagmalfunction sang VCM kag SD cards.
Gindula man ni Sorbito ang kahangawa sang publiko nga mahimo nga madayaan ang VCM bangud humalin sang nag-umpisa ang automated election sang 2010, ang mga election machines ang ginapaidalom sa final testing kag sealing nga ginapakita man sa publiko antes ang adlaw sang eleksyon.
Ini agud testingan paagi sa mock election ang mga VCM, kun sa diin ginalantaw kun insakto ang pag-isip kag pagtotal sang boto kag gina-zero ini agud nga mapakita nga wala sang unod ang memory sang counting machine.
Nagpasalig man ang election officer nga ang COMELEC ang nagapatigayon sang honest, credible kag accurate nga eleksyon
