Nakilala na ang katapo sang New People’s Army nga napatay sa engkwentro batok sa mga miyembro sang 15th Infantry Battalion sang Philippine Army sa Sitio Bajay, Brgy. Caliling, Cauayan, Negros Occidental kahapon sang aga.
Suno kay Capt Kim Apitong, spokesperson sang 3rd Infantry Division nga ang napatay ang ginkilala kay Celso Rebunalo alyas Larry, 62 anyos, residente sa Barangay Yawyaw, Cauayan, Negros Occidental, nga amo ang squad leader sa Squadron Platoon 2 sang Southwestern Front (SWF) sang Komiteng Rehiyon-Negros.
Ini ang nakaangkon sang igo sang bala sa lawas.
Nagapati ang mga ini nga madugay na nga katapo sang NPA si Rebunalo.
Suno kay Apitong, ang engkwentro ang ika-14 na nga encounter nag nagluntad sa nasakupan sang 3rd ID humalin sang Enero tubtob kahapon.
Kun sa diin siyam na ang mga napatay sa bahin sang NPA, 34 ang mga na-neutralize, 15 ang nagsungka kag walo ang naaresto.
Paathag sini nga anom ka mga group leader ang ila na nga nadakop kag ang pinakamataas amo ang Deputy Secretary sa Komiteng Rehiyon-Negros nga si Ramon Patriarca kasubong man ang pila ka mga Finance Leader kag Political Officer nga kalabanan ang gikan sa Negros Island.
Aminado si Apitong nga maluya na ang pwersa sang makawala nga grupo rasun kun ngaa sa tion sang engkwentro, ang mga ini ang masami nga may casualties.
Magluwas sa mas dyutay ang rebelde nga grupo, mas mabaskog naman sa karun ang firepower sang mga suldado.
Pasalig ni Apitong nga ginasunod sang mga militar ang ila nga mandato nga protektahan ang mga pumuluyo.
Nagasuporta man ang mga ini sa mga election related operation sang mga kapulisan kag nagapadayun ang pagpatigayon sang mga combat operations agud nga malagas ang mga remnants sang Communist Party of the Philippines-New People’s Army (CPP-NPA).
