Nagapreparar na ang Bureau of Jail Management and Penology sa pagpasakop sang mga Persons Deprived of Liberty (PDL) sa Western Visayas sa palaabuton nga May 9 National Elections.
Suno kay Jail Chief Inspector Atty. Jairus Anthony Dogelio, tagpamaba sang BJMP Region 6, ang Regional office ang nagpanaog na sang derektiba sa mga Jail units nga magpreparar sa maabot nga PDL voting.
Paathag sini nga ang mga PDL nationwide ang ginahatagan man sang kahigayunan nga makapartisipar kag ma-exercise ang kinamatarong sa pagpili sang lideres sa pungsod bilang pumuluyo sang Pilipinas.
Sa Western Visayas ang PDL Voters ang ginabug-usan sang 6,939 ka mga priso nga ginalakipan sang 3,965 gikan sa mga jail facilities sa Negros Occidental samtang 2,974 naman sa Panay Island.
Suno kay Dogelio, nagsaka ang numero sang mga botante nga PDL mahimo bangod sa pagpatigayon sang onsite registration sang Commission on Election sa sulod mismo sang jail facilities.
Samtang natunga naman sa duha ka sahi ang pagcast sang boto nga ginalakipan sang onsite voting pinaagi sa mga satellite voting precinct nga itukod sa sulod sang mga jail facilities kasubong man ang mga PDL nga magaboto sa gwa sang pasilidad nga magakinahanglan sang escorts.
Paathag ni Dogelio nga kinahanglan pa nga magkuha sang court order ang Jail Warden agud mapahanugutan ang mga priso nga magaboto sa gwa sang prisinto.
Suno diri, ang mga sa gwa magaboto amo ang mga PDL nga nakarehistro sa iban nga lugar.
Paathag naman sini nga gamay lang ang porsyento sang escortee voting bangod kalabanan ang sa sulod na mismo sang Jail facility magaboto.
Apang suno kay Dogelio, ang mahimo lang nga pilian sang mga priso amo ang National positions kasubong man mga partylist apang indi na ang mga ini makabahin sa pagpili sa magapungko sa local positions.
