Isa ka scholar sang Negros Occidental Provincial Government nga katapo sang Indigenous People (IP) Community sa banwa sang Salvador Benedicto ang naggradwar bilang Summa Cum Laude sa kurso nga Bachelor of Science in Hotel and Restaurant Management sa Central Philippine State University (CPSU) – San Carlos Campus.
Siya ang ginkilala kay Jim John Tolentino nga nagrank no. 1 sa General Weighted Average (GWA) nga 1.21.
Si Tolentino ang leadership awardee man bilang Supreme Student Government (SSG) president kag ginhatagan man sang distinction bilang “Best in On-the-Job Training (OJT)”.
Nahibaluan nga ang Provincial Government ang nagahatag sang scholarship programs kag may-ara man sang category sini nga para sa mga Ips.
Suno kay Karen Dinsay, head sang Negros Occidental Scholarship Program division, sang Academic Year 2020-2021 pa naggradwar sanday Tolentino apang bangod sa pagkapostpone sang graduation bangod sa COVID-19 pandemic, ang 71st virtual commencement program ang napatigayon lang sini nga Marso 30, 2022.
Dugang pa sini nga si Tolentino ang isa sa 602 ka mga Ips nga scholar sang probinsya.
Suno diri, ang mga katapo sang IP Community lang ang may-ara sang scholarship category nga nagasuporta humalin sa Elementary, Highschool tubtob na sa Kolehiyo.
Bilang provincial scholar, si Tolentino ang nagabatun sang P3,000 kada bulan kag P3,500 nga para naman sa mga libro kag uniform allowance kada semester tubtob sa iya paggradwar.
Si Tolentino ang ika-pito sa walo ka mag-ulutod kag ang achievement sini ang iya nga ginahalad sa pagpangabudlay kag sakripisyo sang ila mga ginikanan nga lunsay mangunguma.
Gincongratulate man ni Governor Eugenio Jose “Bong” Lacson ang Summa Cum Laude kag gindayaw ini bangod sa iya nga determinasyon agud nga magpanguna sa klase.
Dugang pa sang gobernador nga si Tolentino ang indi lang mapadayaw sang IP Community kundi sang tanan nga kabataan nga Negrense.
