Gin-athag ni Negros Occidental Governor Eugenio Jose ‘Bong’ Lacson nga legal ang ila desisyon nga isaylo ang pinuno sang Provincial Planning and Development Office sa iya opisina agud nga magtatap sang special concerns.
Ini ang kasunod sang pagfile ni PPDO head Ma. Lina Sanogal sang complaint batok kay Lacson kag Provincial Administrator Atty. Rayfrando Diaz sa Commission on Elections bangud sa ginaalegar violation sang Omnibus Election Code.
Ang complaint ang ginpasaka sa Comelec Law Department sang Abril 5 samtang may separado pa gid nga complaint nga ginfile sa Civil Service Commission sang Abril 1.
Sa karon, wala pa nabaton nanday Lacson ang sulat nagikan sa CSC kag Comelec.
Suno kay Lacson, nagsulat si Sanogal sang Nobyembre 15 tuig 2021 nga nagapahibalo nga pila ka personnel lakip na siya ang magaretiro subong nga 2022 kun sa diin sila ang naghingyo sang budget para sa ila nga terminal leave benefits.
Suno sa gobernador, nag-istoryahanay man sanday Diaz kag Sanogal angot sa early transition bilang preparasyon sa iya nga retirement kun sa diin ini ang ginreassign sa Office of the Governor.
Nagsulat man si Lacson kay Comelec Region 6 Director Wilfredo Jay Balisado sang Marso 15 nga nagahingyo nga igrant ang continuing authority sa provincial government nga magtransfer sang ila officers kag mga employees bisan election period.
Ini ang compliance sa Section 29 sang Comelec Resolution No. 10742.
Ang kopya sang sulat nagikan sang Comelec ang nabaton sang Kapitolyo kahapon, Abril 21.
