Nakibot man ang tagpamaba sang kampo sang Bongbong Marcos-Sara Duterte tandem sa probinsya sang Negros Occidental sa report nga nabaton nga may yara sang natabo nga pagpangbaklas sang mga campaign materials ni VP Leni Robredo.
Sa interview sang Bombo Radyo Bacolod kay anay Murcia Mayor Sonny Coscolluella, wala ini nakahibalo sang natabo nga pagpangbaklas bangud ang ila ginasunod nga polisa nga ginabase sa linyada sang pagpangampanya sang ila kandidato nga sanday Bongbong Marcos-Sara Duterte nga nagaapelar sang unity.
Suno kay Sonny nga ang ila nga polisa ang masami nga kun habuyan sila sang bato baslan nila ini sang tinapay kag ini ang napamatud-an na sang nagpatigayon sang caravan ang kampo ni BBM sa probinsya sang Negros Occidental nga ginhabuyan ini sang kinumos nga tarpauline.
Samtang sang nagpatigayon naman sang caravan ang kampo ni VP Leni Robredo sa probinsya nag-issue si Coscolluella sang general appeal sa BBM supporters nga dapat ihandle ang pagbisita ang Leni-Kiko nga may kalinong kag kindness.
Suno diri natuman man ini bangud sang naglabay ang mga supporters ni VP Leni sa headquarters sang BBM supporters gingwaan ang mga ini kag ginhatagan sang pagkaon kun sa diin masami man nila nga ginahimo.
Ginpasiguro man sini nga ang kampo ni BBM sa probinsya ang wala nagaintra sa indi maayo nga mga buluhaton ilabi na ang ginapahayag nga pamahog kag pagpatalang.
Nagpanindugan ini nga malimpyo ang ginapatigayon nila nga kampanya kag ila man ginakondenar ang mga tawo nga luyag lamang maghimo sang gamo.
Nagpanawagan man ini sang pagbuligay sang tanan sa pag-uswag sang aton gobyerno agud nga liwat naton mabalik ang estado sang pungsod pila na katuig ang nagliligad.
