Padayon ang implementasyon sang subsidy programs sang Department of Social Welfare and Development sa pihak sang election season.
Ini matapos nga ginhatagan sang Commission on Elections sang exemption sa spending ban ang mga subsidy programs sang DSWD.
Suno kay Atty. May Rago-Castillo, spokesperson sang DSWD Region 6, pareho lang nga guidelines ang ginasunod sang DSWD para sa mga regional programs.
Ini ang ginalakipan sang Pantawid Pamilyang Pilipino Program ukon 4PS, Social Pension, kag disaster response kaangay sang paghatag sang family food packs.
Ang mga local government units naman ang may tagsa-tagsa man ka programa agud nga makahatag sang ayuda sa mga pumuluyo ilabi na kun may kalamidad.
Samtang, nagpanugyan ang Department of Social Welfare and Development sa mga benepisyaryo sang Pantawid Pamilyang Pilipino Program (4Ps) nga indi magpati sa pamahog nga indi na sila malakip sa listahan sang beneficiaries kun indi magboto sa nagapamilit nga kandidato.
Suno kay Castillo, aminado ini nga may informal posts ang mga benepisyaryo nga nakabaton sila sang pamahog nga makakas ang mga ini sa listahan kadungan sang eleksyon.
Suno kay Castillo, wala ini sang kamatuoran bangud makakas lang ang benepisyaryo sa listahan kun wala nasunod ang mga kondisyon ukon indi na sila eligible bangud wala na sang bata nga nagaeskwela sa elementary tubtub high school.
Paathag ni Castillo, ang DSWD lamang ang makadesisyon kun makakas ang isa ka benepisyaryo sa listahan base sa mga pagsulundan nga gintalana sang ahensya kag wala man ini nakabase sa impluwensiya sang isa ka pulitiko.
