Duha ang patay kag 15 ang pilason matapos matumba ang van sa National highway sang Sitio Dungon, Brgy Talaban, Himamaylan City, Negros Occidental.
Sa interview sang Bombo Radyo kay Police Captain Romulo Gepilano, deputy chief of police sang Himamaylan City Police Station, patay ang isa ka senior citizen nga ginkilala kay Edna Tupas, 61 anyos, residente sang Barangay Poblacion, Himamaylan kag si Rose Baguious, 59 anyos, residente man sang nasambit nga lugar.
Ang van nga ginamaneho ni Bryan Baguios, nga bata ni Rose, ang nagikan sa Brgy Nabali-an kag padulong kuntani sa Himamaylan City sang nadulaan ini sang kontrol kag natumba ang van kag nakabunggo sa railing sa higad dalan.
Ginhingagaw gilayon ang mga pasahero dala sa ospital kun sa diin dead on arrival ang duha.
Sa karun nakagwa na ang napulo ka iban pa sa ospital kag nagapabilin naman nga nakaconfine sa Bacolod City Hospital ang lima.
