Ginalantaw pa sang pamunuan sang Negros Occidental Police Provincial Office (NOCPPO) kun makabig nga election related incident ang natabo nga pagsalvage kay Levy Ortega sa syudad sang Himamaylan kahapon.
Suno kay NOCPPO spokesperson Police Lt. Abegael Donasco, ginaimbestigaran pa nila sa karun ang nasambit nga insidente bangud may yara sang naulamid nga pangalan sang nagapadalagan nga kandidato.
Nahibaluan nga may placard sa tupad sang bangkay ni Ortega kag may nakasulat nga “ KAP MAKOY NASA IYO PALA SI BEBOT MURILLO AT BOY TAPANG…SEE YOU NEXTIME… BY: JJ.
Si Kap Macoy ukon si Kap Anthony “Makoy” Javelosa ang punong barangay sang Barangay Aguisan, Himamaylan City.
Suno kay Donasco, indi man tanan nga mga insidente nga imbulbado ang pangalan sang mga politician ang insigida na nga mahambal nga election related incidents.
Suno diri ang isa ka insidente nga may imbulbado nga pangalan sang pulitiko ang ginpaidalom sa imbestigasyon agud nga maverify kun ini ang may kaangtanan sa election.
Ginpahayag man sang tagpamaba sang NOCPPO nga indi man gilayon masaylo sa category red ang syudad sang Himamaylan bangud sa natabo nga insidente.
Nagpanugyan man ini sa mga kapulisan nga mangin vigilante bangud nagahilapit na ang adlaw sang pinili-ay.
