Natapos na ang ginpatigayon nga roadshow sang vote counting machine (VCM) sa SM City Bacolod sang Domingo kag sa karun lunsay administrative nalang ang ginahimo nga preparasyon sang Bacolod Comelec Office antes mag-abot ang May 9, 2022 National and Local Elections.
Suno kay Bacolod City Election Officer Atty. Revo Sorbito, wala na sila sang aktibidad nga nakaline-up magluwas nalang sa final briefing para sa mga magaserbe sa eleksyon sa Abril 29 kaangay sang mga Board of Election Inspectors (BEIs).
Pahayag sini nga 450 ang mga polling precinct sa syudad sang Bacolod samtang tatlo ka BEI naman ang magaserbe sa kada presinto.
Paathag ni Sorbito nga ang pagsapol sa mga manunudlo sa Abril 29, ang paghatag nalang sang ulihi nga mga pahanumdom.
Sa pihak nga bahin, ginpahayag sang Election Officer nga wala sang nangin problema sa pagpatigayon sang tatlo ka adlaw nga Comelec Roadshow sang VCM sa SM City Bacolod nga nag-umpisa sang Abril 22 tubtob 24.
Pinaagi sa aktibidad, nahimo nga makita sang publiko ang machine kag nahimo ini nga matest antes paman ang eleksyon.
Paathag ni Sorbito nga isa lang ka VCM ang ila nga gingamit sa pagcast sang boto.
Samtang ginpasalig naman sang election officer nga wala na sila sang dako nga concerns bangod malinong kag matawhay man ang pagpatigayon sang mga election activities sang mga kandidato sa syudad.
Apang aminado ini nga madamo sang wala nagapamati natuhoy sa pagsulundan sa illegal posting sang mga campaign materials sa indi nagakaigo nga lugar.
Suno kay Sorbito, ginatugyan na sini sa mga pumuluyo kun may luyag nga magfile sang kaso batok sa mga nagatakod sang campaign materials sa mga ginadumilian nga lugar.
Apang sa karun, wala pa sang nabatun nga reklamo ang Bacolod Comelec Office natuhoy diri.
