Ginpanugyan sang Negros Occidental Provincial Election Supervisor nga dapat magfile sang formal complaint sa opisina sang Commission on Election (Comelec) ang mga pumuluyo nga naka-eksperyensya sang pagpamahog ukon intimidasyon sa napili nga pagabutuhon nga kandidato.
Madumduman nga sang damlag lang, nagpahayag si anay congressman Rafael “Lito” Coscolluela, nga nagaserbe nga tagamaba sang Leni-Kiko Group sa Negros Occidental nga may nabatun ang mga ini nga reports gikan sa ila nga mga supporters sa southern, negros nga ang mga ang gina-intimidar kag ginapahog sang kasumpong nga supporters sang BBM-Sara tandem.
Suno kay Atty Roberto Salazar, nakita naman sini sa mga post sa social media ang mga reklamo kasubong man ang pronouncement ni Coscolluela, apang mas maayo suno sa Election Supervisor nga magfile ang mga ini sang formal complaint.
Ini agud nga indi mahulog sa sugilanon lang ang ila nga ginareklamo nga nagakatabo sa pagpangampanya.
Pasalig ni Salazar nga bukas ang iya nga opisina sa pagbatun sang reklamo natuhoy sa threat, intimidation, vote buying kag kasubong man terrorism may kaangtanan sa eleksyon nga makabig election offenses.
Kun may mabatun nga pormal nga reklamo, ila man ini nga paga-estoryahan upod sa mga miyembro sang Joint Security Council nga ginalakipan sang Armed Forces of the Philippines (AFP) kag Philippine National Police (PNP).
Ang mga nasambit nga ahensya sang gobyerno ang gilayon naman nga magahimo sang nagakaigo nga tikang kag makabig nga election offense sa preliminary investigation palang kun ang reklamo ang may kaupod nga pamatuod ukon ebidensya.
Dugang pa sini nga paga-estoryahan man sang mga ahensya kun paano maprebentar ang kaangay nga mga iligal nga aktibidad partikular na sa mismo nga election day.
