May kaakig nga ginpatpat sang 14 anyos nga bata sang ginsalvage sa Purok 1, Barangay Aguisan, Himamaylan City sang Domingo kun paano gin-abduct ang ila nga amay.
Sa interview sang Bombo Radyo Bacolod kay alyas Junjun, sang natabo ang insidente, tatlo sila ang upod sa balay sa Barangay Estefania sang iya amay nga si Levy Ortega, 36 anyos kag ang nagakatulog sini nga manghod.
Sang bukas pa ang ila nga tyangge, may nagalabay-labay na nga van nga brown, Mitsubishi Adventure nga puti, Nissan Navarra nga itom kag motorsiklo nga Honda Beat.
Alas-11:00 sang gab-i, sang ginsirado na ang ila nga tyangge kag magapanyapon na kuntani, hinali nalang nga nagdulog ang mga salakyan sa gwa sang ila balay kag pwersahan sila nga ginsulod.
Ini man ang una nga nakakita bangod yara lang ini sa gwa sang balay kag nagaduyan kun sa diin ang mga lalaki ang lunsay nakasuksok sang bonnet kag itom nga jacket kag palarehas nga nagauyat sang cal. 45 pistol.
Gilayon nga nagsinggitan ang mga armado nga lalaki sang hapa, apang bangod wala ini gilayon nagpati siya ang ginsipa kag nagapasalamat ini nga wala makita sang mga suspetsado ang nagakatulog niya nga manghod.
Suno diri ginbitbit sang mga ini ang iya nga amay pasulod sa van, kag bangod sa nagasinggitan ini nga maga-upod ginhambalan ini sang isa nga magpahimunong bangod magabalik pa ang mga ini.
Ginabanta sini nga masobra sa 17 ang mga armado nga kalalakinhan, bangod lima ang nakita sini nga sakay sa Adventure, 10 sa van, kag duha ang sa Honda Beat, apang wala na sini makita kun pila ang sakay sang Navarra bangod sa malayo ini nagdulog.
