Nakabaton sang merit award ang 33 ka mga suldado nga katapo sang 15th Infantry Battalion kag isa ka CAFGU active auxilliary member matapos ila nga nakaengkwentro ang mga miyembro sang New People’s Army (NPA) sa Brgy. Caliling, Cauayan, Negros Occidental sang Abril 19.
Madumduman nga ang engkwentro ang nagresulta sa pagkapatay sa isa ka 62 anyos nga katapo sang makawala nga grupo.
Ang 33 ka mga suldado ang ginhatagan sang bronze military medal kun sa diin mismo ang Commanding Officer sa 3rd Infantry Division sang Philippine Army nga si Maj. Gen. Benedict Arevalo ang nag-award sa mga ini.
Magluwas sa pagkilala sa mga katapo sang 15th IB, kaupod man nga ginhatagan sang pagkilala ang katapo sang CAFGU active Auxillary bangod sa pag-upod sini sa nagluntad nga pagpakig-away.
Samtang sa 33 ka mga suldado nga nakabatun sang medalya, duha diri ang mga opisyal samtang ang 31 ang mga enlisted personnel sa 15th Infantry Batallion.
Ginapasalig man sang mga kasuldaduhan nga padayun ang ila nga pagpakigbato sa makawala nga grupo nga may-ara sang indi husto nga ideolohiya.
Ginpasalamatan man sang mga ini ang pagbulig kag pagkooperar sang mga pumuluyo.
Samtang ginpasalig man nga ginakilala ang efforts kag nangin kadalag-an sang 15th IB sa nagluntad nga engkwentro batok sa NPA sa banwa sang Cauayan.
Pasalig pa sang mga militar nga ila tinguhaan nga mahimo bilang peace-loving nga lugar ang tanan nga nasakupan sang 3rd Infantry Division sang Philippine Army.
