Nagapati ang convenor sang Kontra Daya nga dapat pareho nga manabat ang Impact Hub Manila kag Commission on Elections (Comelec) matapos nagwa ang issue nga wala mabayaran ang Sofitel, ang hotel nga ginpatigayunan sang debate sang mga presidential candidates.
Sa interview sang Bombo Radyo Bacolod kay Professor Danilo Arao, dapat mapaathag sang Impact Hub kag Comelec kun ngaa wala sang unod ang cheque nga ginbayad sa Sofitel.
Suno kay Arao, magluwas sa paathag angot sa wala unod nga cheque dapat mangin bukas man sa publiko ang kontrata sa tunga sang Comelec kag Impact hub Manila.
Natingala man ini kun ngaa ang Impact hub ang nangin partner sang Comelec sa pagpatigayon sang debate bangud makabig ini nga public affairs program.
Suno kay Arao dapat sa media entities kaangay sang Bombo Radyo ini itugyan bangud ang mga ini ang may ikasarang sa pagpatigayon sang programa.
Isa man sa palamangkutanon sini kun sa diin nagkuha sang income ang impact hub bangud ginpahayag nga wala sang budget nga ginpagwa ang gobyerno para sa presidential debate.
Ginpahayag man sini nga sa Sofitel pa ginpatigayon ang mga debate apisar nga madamo man sang mga eskwelahan nga may kapasidad nga magpatigayon sa kaangay nga aktibidad.
Nagpanugyan man ini sa mga botante nga mangin maalam sa pagpili sang kandidato sa palaabuton nga piniliay.
