Ginkumpirmar sang fire marshal sang Bacolod City Fire Station nga kuryente ang gintunaan sang kalayo sa isa ka commercial building sa Corner Gonzaga-Lopez Jaena Street, Barangay 26, Bacolod City, Lunes sang gab-i.
Ang 3-storey commercial building nga ginapanag-iyahan ni Tomas Lim, ang balaligyaan sang spare parts sang mga salakyan kag motorsiklo kun sa diin sa idalum nahamtang ang Big Thumb General Merchandiser, samtang ang sa naibabaw nga bahin ang nagaserbe naman nga stockroom kag residential quarter sang mga empleyado.
Apat ka mga persona ang narescue sang mga bombero gikan sa naibabaw nga bahin sang nagakalayo nga establishimento.
Suno kay Fire Chief Inspector Rodel Legaspi, ang mag-asawa nga empleyado nga sanday Jane Moreno, 35-anyos kag Mark Anthony Moreno, 31 anyos ang nagbulagay sang natabo ang sunog kun sa diin kaupod ni Mark ang bata sini nga isa ka tuig sa ikaapat nga panalgan samtang si Jane ang yara naman sa 3rd floor kaupod ang isa pa gid ka empleyado nga si Jinkee Chavez, 19-anyos.
Suno kay Legaspi, madinalag-on nga nasalbar ang apat sa ila ginpatigayon nga rescue operations.
Sa ila pagpang-usisa, sa babaw nga bahin sang building, partikular na sa storage area nagsugod ang kalayo kag ini ang electrical in nature bangud may mga outlets kag extension cord nga nakatapik sa lugar.
Nagdangat naman sa P4 million ang balor sang halit bangud sa nasambit nga floor mismo nakabutang ang ila mga supplies.// Sa karun nagapatigayon pa sang examination sa lugar kag pag-usisa sa tag-iya.
