Nagpatigayon kaina sang aga sang simultaneous nationwide logistical readiness test ang Philippine National Police (PNP) para sa paghatag sang seguridad sa tion sang May 9, 2022 election kag nalakip na diri ang Bacolod City Police Office (BCPO).
Sa interview sang Bombo Radyo Bacolod kay BCPO spokesperson Police Lt. Col. Sherlock Gabana, ang simulation exercise nga ginpatigayon kaina sa BCPO kag sa iban pa nga bahin sang pungsod ang para sa preparasyon sang mga kapulisan sa tion nga may matabo nga mga sirkumstansya sang disgusto sa resulta sang May 9, 2022 elections.
Ini ang direktiba nagikan sa national headquarter kag ang ginpatigayon nga simulation exercise ang agud nga mapakita nga nakahanda na ang mga kapulisan sa May 9, 2022 elections.
Suno kay Gabana, 95 porsyento sila nga handa para sa eleksyon kag indi man ini makasiling nga sila ang 100 porsyento nga preparado bangud aminado ini nga may mga hitabo kag insidente nga indi mapaktan.
Wala man ang BCPO sang nakita nga kabudlayan bangud nagakooperar man ang mga pumuluyo sa syudad sang Bacolod.
Preparado naman ang BCPO apang aminado man ang mga kapulisan sa syudad sang Bacolod nga may kakulangan sang personnel, apang ini ang masarangan man nila nga mapun-a.
Ginrepresentar man kaina ang mga mobile patrols, motorcycles kag iban pa nga mga galamiton kag bitbiton sang mga kapulisan kasubong man ang CDM equipments.
Wala man sang narecord nga election related incidents ang BCPO kag nagalaom man ini nga tubtob matapos ang eleksyon wala sang marecord nga insidente.
