Nangin madinalag-on kag matawhay ang una nga adlaw sang local absentee voting sang mga kapulisan sa Negros Occidental kahapon.
Nahibaluan nga ang local absentee voting ang gintalana kahapon, Abril 27 tubtub bwas, Abril 29.
Suno kay Negros Occidental Police Provincial Office (NCPPO) spokesperson P/Lt Abegael Donasco, 665 ka mga police personnel ang nagboto nga ginalakipan na sang NOCPPO kag Bacolod City Police Office (BCPO) personnel.
Suno kay Donasco, 1,753 ang tanan nga NOCPPO personnel nga nagparehistro nga makigbahin sa local absentee voting.
Ang 1,753 ka police personnel suno kay Donasco ang nagikan sa NOCPPO headquarters, National Support Unit (NSU), Regional Mobile Force Batallion (RMFB) 6 kasubong man ang pila ka mga kapulisan gikan sa 31 ka mga municipal kag city police stations sa Negros Occidental.
Nagalaom naman si Donasco nga indi lang sa una nga adlaw kundi tubtob sa matapos ang local absentee voting, magapabilin nga matawhay kag malinong ang piniliay.
Ang mga boto sang kapulisan ang kabahin man sa magadeterminar kun sin-o ang mangin masunod nga Presidente sang Pilipinas.
