Ginkumpirmar sang chairman sang Committee on Transportation sa Sangguniang Panlungsod sang Bacolod nga nagpasalig na si Bacolod City District Engineer Jaime Javellana nga magakoordinar na sa city government sa tion nga magapatigayon sang mga road constructions sa idalum sang Department of Public Works and Highways.
Ini kasunod sang mga reklamo nga nabatun ni Bacolod City Councilor Dindo Ramos gikan sa Bacolod City Traffic Authority (BTAO) kag pila ka mga motorista nga nagatuga sang huol sa publiko ang mga road closure kasubong man ang trapiko bangod sa mga ginapatigayon nga pagbungkag sang dalan sa syudad partikular na sa Shopping area.
Pahayag sang konsehal nga gintalakay nila sa session sang Sangguniang Panlungsod ang issue, agud nga ini ang ma-address gilayon.
Suno sa konsehal una nga ginlapas sang Bacolod City Engineering District ang indi pagkoordinar sa local government unit (LGU) sa pag-implementar sang proyekto sang Department of Public Works and Highways kag ikaduha amo ang pagpatigayon sang pagsarado sang mga dalanon nga wala nagpangayo sang otoridad sa City Government.
Suno kay Ramos, dapat nagkoordinar sa LGU kasubong man sa BTAO agud nabutangan sang tawo nga amo ang magaregulate sang trapiko kasubong man sa rerouting kun kinahanglanon.
Nakabatun na ini sang sulat gikan kay Engr. Javellana nga nagapangayo sang pasaylo kag nagpasalig nga makakoordinar na sa masunod sa City Government antes magpatuman sang proyekto, nga gilayon naman nga ginbatun sang konsehal.
