Nakaboto na ang tanan nga personnel sang Bureau of Fire Protection sa Negros Occidental nga eligible nga makigbahin sa local absentee voting nga nagsugod kahapon.
Sa interview sang Bombo Radyo kay Fire Supt. Kim Celisio, provincial director sang BFP Negros Occidental, 47 ka mga personnel ang eligible nga magboto paagi sa local absentee voting kag nakaboto na sila tanan kahapon.
Suno kay Celisio, kalabanan nga personnel ang mga lalaki kag sila ang tumandok sang Panay Island gani indi makapauli sa Mayo 9 agud nga makaboto bangud may trabaho ang ahensya may kaangtanan sa eleksyon.
Sa karon, handa na ang BFP para sa pagbulig sa iban nga ahensya sa pagbantay sa katawhay kag kaluwasan sang piniliay.
Tinalikdan nga semana suno kay Celisio, nacheck na sang BFP ang mga eskwelahan nga patigayunan sang piniliay apang tsekyaron ang mga ini liwat sa masunod nga semana.
Nagpanugyan man si Celisio sa mga botante nga antes magbiya sa balay sa Mayo 9 agud nga magboto, siguruhon gid nga naswitch off ang linya sang kuryente agud nga malikawan ang sunog.
Nagpanugyan man ini nga magdala sang tubig kun magpadulong sa polling centers bangud tuman kainit ang panahon.
