P3.4 million nga balor sang suspected shabu ang nakumpiskar sang mga miyembro sang Bacolod City Drug Enforcement Unit sa buybust operation nga ginpatigayon sa Purok Katilingban, Barangay Banago, Bacolod City kaina sang kaagahon.
Suno kay CDEU head Police Lt. Joven Mogato, tatlo ang nadakpan sa nasambit nga operasyon.
Sila ang ginalakipan nanday Sandy Romero, 25 anyos, ginakabig nga high value individual; Sunny Boy Guino-ohan, 47 anyos; kag Rudy Talabon, 56 anyos, lunsay mga residente sang Purok Katilingban, Barangay Banago.
Nakuha sa paghinakop sang mga ini ang 17 tanan ka sachets sang suspected shabu nga ginabanta nagabug-at sang 500 grams kag nagabalor sang P3,400,000.
Suno kay Mogato, si Romero ang subject sang buybust operation apang gindakop man ang duha niya ka kaupod.
Si Guino-ohan ang amay ni Romero apang apelyido sang iya iloy ang ginadala ni Sandy.
Santo sa rekord sang CDEU, wala sang previous record si Romero apang ginakabig na ini nga drug personality.
Nagapati naman ang CDEU nga ginahimo sang subject nga front ang iya trabaho bilang delivery food rider agud nga makabaligya sang illegal nga druga bangud wala naman sila sang iban pa nga trabaho.
Suno kay Mogato, may nagadul-ong sang shabu kay Romero kag ginatabo niya lang ini sa isa ka bahin sang Banago ukon sa iban man nga barangay sa Bacolod.
