Nagdangat na sa 3,797 ang mga kapulisan sa Western Visayas nga nakaboto sa ikaduha nga adlaw sang local absentee voting kahapon.
Suno kay P/Lt Col Arnel Solis, tagpamaba sang Police Regional Office 6, kahapon ang nagboto nga personnel sang Philippine National Police (PNP) sa Western Visayas ang nagdangat sa 2,039 samtang 1,758 naman ang sa una nga adlaw sang local absentee voting sang Abril 27.
Ang 2,039 kahapon ang ginalakipan sang 155 sa Aklan Police Provincial Office; 162 sa Antique Police Provincial Office; 2016 sa Capiz Police Provincial Office; 93 sa Guimaras Police Provincial Office; 784 sa Iloilo Police Provincial Office kag 639 sa Negros Occidental Police Provincial Office.
Paathag ni Solis nga mano-mano ukon tradisyunal ang ginpatigayon nga pagboto santo sa proseso nga gintanyag sang Commission on Election (Comelec).
Ginapakamaayo naman ni Solis nga wala sang reported nga may abriya ukon problema nga natabo sa mga polling centers nga ginpatigayunan sang local absentee voting.
Si PRO 6 Director P/Brig Gen Flynn Dongbo ang nagbotar naman kahapon sa Iloilo Police Provincial Office.
Nagapanugyan man ini sa mga kapulisan nga dapat ma-exercise sang mga ini ang ila nga kinamatarung sa pagpili.
