Nagdangat na sa masobra 50 porsyento sang mga katapo sang 3rd Infantry Division sang Philippine Army ang nakatapos na sa Local Absentee Voting sa ikaduha nga adlaw sang aktibidad.
Suno kay Capt. Kim Apitong, spokesperson sang 3rd ID ang mga nakigbahin ang ginalakipan sang mga suldado nagikan sa 301st Infantry Brigade sa Panay Island, 302nd Infantry Brigade sa Negros Oriental kag 303rd Infantry Brigade sa Negros Occidental.
Pahayag sini nga 1,186 ka mga suldado ang nagparehistro sa local absentee voting humalin sang Abril 27 tubtob na subong nga adlaw Abril 29.
Gin-athag man ni Apitong nga manual voting process ang ila nga ginpatigayon kun sa diin wala sila nagagamit sang vote counting machines.
Gina-assist man ang mga ini sang personnel sang Commission on Election (Comelec).
Nagalaom naman si Apitong nga makabotar subong nga adlaw ang tanan nga mga suldado nga magaserbe sa Election Day sa Mayo 9.
Samtang ginpahayag man sini nga nagpanawagan naman si 3rd ID Commander Maj Gen Benedict Arevalo sa mga militar nga iptractice ang rights of suffrage.
Suno kay Apitong, ang mga militar, kapulisan kag Philippine Coast Guard ang nagabotar sang temprano agud nga wala na ang mga ini sang palaligban sa adlaw sang eleksyon kag maseguro sang mga ini nga mapatigayon ang malinong nga eleksyon.
