Gin-athag sang provincial election supervisor sang Negros Occidental nga sa Mayo 9 pa isipon ang boto sang mga empleyado sang gobyerno kag mga katapo sang media nga nagboto paagi sa local absentee voting halin Abril 27 tubtub subong nga adlaw.
Suno kay Atty. Roberto Salazar, ang ginpanagtag nga balota ang direkta nga naghalin sa committee on local absentee voting sang Commission on Elections nga ginpanagtag sa mga opisina nga makigbahin sa binotohay subong nga semana.
May napartinisir naman nga balota sa kada applicant nga ginbutang sa inner envelope nga may yara sang inner seal kag ginsulod sa outer envelope nga may outer seal.
Ang opisina ang nagconduct sang local absentee voting amo naman ang magapadala sang mga balota sa committee on local absentee voting sa Intramuros, Manila nga magatukod sang Special Electoral Board agud nga mag-isip sang boto sa manual nga paagi.
Ang mga balota suno kay Salazar ang buksan lamang sa adlaw sang eleksyon agud nga maisip ang boto.
Sa mga pulis diri sa Negros Occidental, gindesignate ang headquarters sang Negros Occidental Police Provincial Office bilang voting center, duha lamang ang katapo sang media nga nagboto, samtang ang mga suldado naman ang nagboto sa brigade ukon battalion headquarters.
