Gin-athag sang provincial health officer sang Negros Occidental nga ang ikaduha nga booster shots sang COVID-19 vaccine ang ginahatag sa mga high risks individuals kasubong man sa may mga commorbidities tatlo ka bulan matapos ang una nga booster shot agud nga mapabakod pa ang antibodies sa atun lawas.
Sa interview sang Bombo Radyo Bacolod kay Dr. Ernell Tumimbang, prayoridad nga mahatagan sang ikaduha nga booster dose ang mga high risks individuals ukon may commorbidities.
Suno kay Tumimbang, ginatublukan kita sang booster dose bangud ang antibodies sa atun lawas ang nagapanaog na gani ginakinahanglan sang booster shot agud magsaka ang antibodies sang atun lawas.
Gin-athag man sini nga ang pagtublok sang booster shots ang indi bangud sa may bag-o nga variants kundi agud nga mapasaka ang antibodies sang atun lawas.
Suno pa diri kun manubo ang antibodies mahimo matapikan sang nasambit nga balatian ialbi na nga may magsulod nga bag-o nga variants.
Ginatutukan sa karun sang provincial health office nga matublukan sang booster dose sang COVID-19 ang mga high risks individuals kag may yara sang commorbidities.
Ginpahayag man ni Tumimbang nga manubo ang coverage sang first booster sa probinsya.
Suno pa diri apektado man ang second booster bangud manubo ang first booster.
Samtang nabaton naman sang probinsya ang notice nagikan sa Food and Drug Administration (FDA) nga extended ang shelf life sang COVID vaccine nga yara sa probinsya gani indi ini maexpire subong nga adlaw.
