Nagapanawagan ang station commander sang Bacolod Police Station 8 sa Bureau of Jail Management and Penology – Bacolod nga sila naman ang magpangayo sang pasaylo bangud sa nagalapta nga druga sa ciudad sang Bacolod.
Ini matapos nga P1.3 million nga balor sang suspected shabu ang nakumpiskar gikan sa tatlo ka persona sa ginpatigayon nga buybust operation sa Purok Kahirup, Barangay Singcang Airport, Bacolod City sang Sabado sang gab-i.
Ang mga nadakop sa nasambit nga operasyon ang ginkilala kanday Baby Girl Villarna, 33 anyos, single kag residente sa Barangay Banago, Bacolod City; Elmar Gallego, 33 anyos kag Edmar Infante, 26 anyos lunsay single kag mga residente sa syudad sang Silay, Negros Occidental.
Suno kay Police Major Joery Puerto, nagpagwa sang impormasyon si Villarna nga ang ginakuhaan sini sang iligal nga druga ang may koneksyon sa sulod sang BJMP – Bacolod.
Suno kay Puerto, santo sa pahayag ni Villarna, may yara sang source sang illegal nga druga sa sulod sang prisuhan.
Madumduman nga sang Pebrero, nagdemand ang BJMP sang public apology kay Puerto matapos ini nagpagwa sang pahayag nga may impormasyon sila nga ang source sang druga ang yara sa sulod sang BJMP.
Nagpagwa naman sang apology statement si Puerto sang Pebrero.
Sa karun, siya naman ang nagademand sang pasaylo nagikan sa BJMP bangud sa nagalapta nga druga sa ciudad, kag ginpahayag nga dapat kay-uhon nila ang ila trabaho.
Suno diri, may yara siya sang ebidensya sa iya mga alegasyon kag may nakaptan nga video nga ang ila inmate ang nagapalapta sang illegal nga druga.
Gindugang man sini nga ang mga kapulisan ang nagapulaw-bugtaw kag ginabutang sa risgo ang kabuhi sa pagpakigbato sa iligal nga druga gani dapat himuon man sang BJMP ang ila mga trabaho.
