Mahimo nga subong nga adlaw nalang ang ulihi nga pagsapol sang Provincial Joint Security Control Center (PJSCC) sang Negros Occidental agud nga ifinalize ang mga adjustments sa pagpatigayon sang security measures sa tion sang eleksyon.
Suno kay Negros Occidental Provincial Election Supervisor Atty Roberto Salazar, magasapol subong nga adlaw ang mga representative gikan sa Philippine National Police (PNP), Armed Forces of the Philippines (AFP), Philippine Coast Guard (PCG), Provincial Health Office (PHO) kag pila ka mga concerned sectors upod ang Commission on Election (Comelec).
Paathag sang Election Officer nga halos nahitso naman ang mga pagsulundan, kag mahimo gamay nalang nga adjustment ang igadugang.
Pasalig man sini nga wala naman sila sang nakita nga problema may kaangtanan sa security plan bangod nakaligad palang nga semana plantsado na sang mga ini ang deployment sang mga kapulisan, suldado kag Coast Guard personnel.
Madumduman nga naubos na panagtag sa tagsa ka syudad kag banwa sa Negros Occidental ang mga election paraphernalia kalakip na ang mga official ballots.
Sa karun suno kay Salazar, ginahulat nalang ang adisyunal nga mga vote counting machines (VCM) kag back-up nga batteries agud nga madasig ma-islan ang mga kagamitan inkaso nga magka-abriya.
Nahibaluan nga may-ara sang 2,906 ka mga clustered precinct sa bilog nga Negros Occidental gani 2,906 man ka mga unit sang VCM ang inisyal nga gamiton.
