KYIV – Nadelay ang pag-evacuate sang dugang nga mga sibilyan nagikan sa Ukrainian port city sang Mariupol sang Lunes kag ginatos ka mga persona ang nagapabilin nga natrap sa Azovstal steel works.
Sa karun indi pa maathag kun ano ang rason sang paghold sang isa ka convoy nga may unod nga mga sibilyan nagikan sa nasambit nga ciudad.
Sang Domingo, ginpadayon sang Russian forces ang pag-atake sa steel works pagkatapos madinalag-on nga nakahalin ang convoy sang mga buses nagikan sa lugar.
Ang kapalaran sang mga sibilyan nga natrap sa Mariupol, nga pila ka semana nga nag-antos sa pagpang-atake sang Russian forces, ang sentro sa karun sang humanitarian concern samtang nagapadulong ang gyera sa ikatatlo sini nga bulan.
Linibo ka mga persona ang ginapatihan nga nagkalamatay kag ang mga nabilin nga natrap sa Azovstal complex ang nakawad-an na sang tubig, pagkaon kag bulong.
Suno kay Ukrainian Deputy Prime Minister Iryna Vereshchuk, ang sitwasyon ang senyales na sang isa ka matuod-tuod nga humanitarian catastrophe.
Natalana nga magpatigayon sang emergency talks ang mga energy ministers sang European Union sa Brussels tuhoy sa demand sang Moscow nga magbayad ang mga European sang Russian gas gamit ang roubles.
