Nakahanda na ang Police Regional Office 6 sa paghatag sang seguridad sa May 9, election.
Sa interview sang Bombo Radyo kay Police Lt. Col. Arnel Solis, spokesperson sa PRO-6, nakahanda na ang tanan nga mga kapulisan para sa May 9 national kag local elections.
Suno kay Solis, ang Commission on Elections (COMELEC) ang nagahatag sang schedule sa Philippine National Police, agud nga mahatagan sila sang security ilabi na sa pagdul-ong sang mga Vote Counting Machines (VCMs), official ballots kag iban pa nga mga election paraphernalia.
Suno kay Solis natumod na sang PRO6 kun sa diin sila magakuha sang personnel nga ipadala para sa augmentation kasubong man kun sa diin ang mga ini ipadala agud mag-augment.
Wala man sila sang nabaton nga report nga ginatarget ang mga VCMs.
Nagapabilin man ang hugot nga pagbantay sang mga kapulisan sa mga Election Watchlist Areas ukon EWAs.
Sa Western Visayas wala man sang reported nga insidente nga natabo sa mga lugar nga nalakip sa EWAs.
Ginpahayag sang tagpamaba sang PRO6 nga sa Rehiyon 6 may yara sang 44 ka mga lugar nga ginpaidalom sa election watchlist, ini ang ginalakipan sang apat sa category yellow, 35 sa category orange kag lima ang ginpaidalom sa category red kun sa diin apat sa Negros Occidental kag isa sa Iloilo.
Suno kay Solis, nagahulat nalamang sila sang schedule nga ihatag sa ila para sa augmentation deployment.
