Ginkalipay sang 3rd Infantry Division sang Philippine Army ang resolusyon nga ginpasar sang Commission on Elections nga nagasiling nga ang paghatag sang pondo sa Communist Party of the Philippines-New People’s Army-National Democratic Front ang bayolasyon sang electoral laws sang Pilipinas.
Sa Paragraph 7 sang Comelec Memorandum nga napetsahan Abril 28, nakasaad nga santo sa Comelec Resolution No. 22-0179, ang paghatag sang permit to win kag permit to campaign sa CPP-NPA-NDF kag sa ila allied organizations ang sakop sang layi nga nagadumili sang vote buying kag vote selling.
Bangud sini, ang sin-o man nga kandidato nga maghatag sang permit to win kag permit to campaign ang sarang nga mapinahan sa idalom sang Section 261 sang Omnibus Election Code.
Sa interview sang Bombo Radyo kay 3rd ID spokesperson Capt. Kim Apitong, ang resolusyon sang Comelec ang makapabakod sang ila kampanya batok sa extortion activities sang NPA kag sarang man manabat ang kandidato sa idalom sang Anti-Terror Law.
Bangud sa resolusyon suno kay Apitong, mahatagan sang paandam ang mga kandidato nga makabaton sang extortion letter.
Nagpanawagan man ini sa mga kandidato nga gilayon nga ireport sa mga pulis ukon suldado kun sila ang may mabaton nga extortion letter agud nga ini ang mavalidate.
Kun wala sang nagahatag sang pondo sa NPA suno sa 3rd ID spokesperson, mauntat na ang ila grupo.
Suno kay Apitong, lauman sang mga pumuluyo nga himuon sang Commission on Elections, Philippine National Police kag Armed Forces of the Philippines ang tanan agud nga mangin matawhay kag matalunsay ang eleksyon sa Lunes.
