Ginkumpirmar ni Bacolod City Election Officer Atty. Revo Sorbito nga patigayunon ang final testing and sealing sang mga vote counting machine (VCM) sa 45 ka mga voting centers sa Bacolod City sa maabot nga Mayo 7.
Suno kay Sorbito, ini ang dulungan nga patigayunon kun sa diin ang VCM ang igadeploy alas-7:00 sang aga, samtang alas-8:00 naman maga-umpisa ang FTS kag ginabanta nga matapos alas-9:00 tubtob alas-10:00 sang aga.
Ginalauman naman ni Sorbito nga wala na sang magaluntad nga technical malfunction nga magatuga agud kinahanglan nga ibalik sa hub ang makina para sa pagrepair.
Paathag sini nga ang final testing and sealing ang ginabuhat agud nga maseguro nga nagagana ang mga VCM kag nagaka-isip sang husto kun ano ang ginboto.
Pasalig man sini nga may selyo ang SD Card gani indi na ini ma-islan kag indi man mabuksan ang box, kag mahimo lang ini nga kuhaon kun maguba ang VCM.
Dugang pa ni Sorbito nga kaangay nga double checking nalang ang matabo bangod antes paman ginbyahe ang mga VCM gikan sa Manila ang mga ini ang natest kag nasilyuhan na.
Nagapasalig man ang Bacolod Comelec Office nga wala sang mangin problema sa maabot nga Mayo 9.
