Ginkalipay sang college administrator sang Bacolod City College (BCC) ang pagkatukod na sang tatlo ka panibag-o nga mga pasilidad sa kolehiyo nga nagabalor sang P350 million.
Suno kay Dr. Ma. Joanna Bayoneta, ang mga bag-ong tukod nga pasilidad ang ginalakipan sang fully-airconditioned nga Activity Center, nga naga-isahanon lang sa syudad sang Bacolod kag sarang mapatigayon sang mga student assemblies, meetings, conventions kag sporting events kag ini ang may-ara sang 1,000 sitting capacity.
Magluwas diri, gintukod man ang panibag-o nga 2-storey Information System Building kag Business Education Building.
Dako ang kalipay sang pamunuan sang kolehiyo bangod dako na ang nangin improvement sang buluthuan humalin sang ginpatukod ni Bacolod City Mayor Evelio “Bing”Leonardia sang 1999.
Isa sa target sang BCC nga ini ang mangin unibersidad gani padayun ang pagtukod sang mga kinahanglanon nga mga pasilidad nga kabahin man sa mga requirements agud mangin University.
Paathag ni Bayoneta nga ang nagapanguna nga rasun kun ngaa gina-imprubar ang ekswelahan agud nga mahatagan sang mas maayo nga learning experience ang mga estudyante.
Ang pagtukod sang mga panibag-o nga pasilidad ang nagdugang naman sa motibasyon sang mga estudyante nga makabalik na sa face-to-face classes.
Pahayag sang College Administrator nga ginaduso na nila ang pagbalik sang student engagement pinaagi sa face-to-face classes kag indi nila luyag nga ang mga first year kag second year students sa karun ang mag-gradwar nga wala man lang nakabalik sa eskwelahan.
